Архивы Ардақ Қабыханов - «ORTALYQ QAZAQSTAN» газеті

Жақсының атын жаңғыртып…

Redactor8 — Thu, 12 Sep 2024 07:12:55 +0000

Арқаға ғана емес, есімі өрелі көрерменге таныс, «Ақпарат саласының үздігі» Ардақ Қабыхановты еске алуға арналған классикалық шахмат және дойбыдан бұқаралық ақпарат құралдары өкілдері арасында турнир өтті. Доданы облыстық «Saryarqa» телеарнасы мен Қазақстан Журналистер одағының облыстық филиалы, сонымен қатар, «Хабар» агенттігі АҚ Қарағанды облысы бойынша меншікті тілшілер қосыны ұйымдастырды.

Турнирдің ашылу салтанатына марқұмның анасы, жұбайы мен баласы, сыныптастары, достары, әріптестері қатысты. Шаршы тақтадағы дода басталмас бұрын Ардақ Қабыханов хақында естеліктер айтылды. Сөз сөйлеушілер оның азаматтығы мен өз саласындағы шеберлігіне тоқталды.

– Ортамыздан жас әрі тосын жағдайда кеткен Ардақ бауырымызды еске алу мақсатында өткізіліп жатқан іс-шара. Бұл достардың, әріптестердің Ардаққа деген шексіз құрметі мен сағынышының лебінен туған үлкен шара деп есептеймін. Ортамыздан ерте кетсе де еселі еңбегімен, парасаттылығымен, азаматтық биіктігімен, жайраңдаған жүзімен, әрқайсымызға мейірім шашып, үлкенді – аға, кішіні – бауыр деген Ардақ Қабыхановты жақындары ғана емес, бірге араласқан достары, әріптестері ұзақ жылдар бойы жүрегінде мәңгі сақтайды, – деді AMANAT партиясы Қарағанды облыстық филиалының төрағасы, облыстық мәслихаттың депутаты Бекзат Алтынбеков.

– Ойда жоқта Арқа жұрты өзінің асыл азаматынан айырылып қалды. Үлкенге де, кішіге де құрметті еді. Нағыз азаматтың жарқын үлгісі еді марқұм. БАҚ саласындағы жұмыс өтілі 20 жылдан асады. 15 жыл бойы «Хабар» агенттігінің» меншікті тілшісі болды. Сол жылдарда микрофоны мен қаламын ұстап аймақ жұртының игілігіне қызмет етті. Соңында қаншама шәкірт қалды. Олардың бәрі бір кездері алдынан жылы жүзбен шығып, телеарна әліппесіне үйреткен ағаларын ұмытпайды, – деді Қазақстан Журналистер одағы облыстық филиалының басшысы Жәнібек Садықанов.

Турнир қорытындысы бойынша дойбыдан «Saryarqa» телеарнасының ардагер журналисі Сейітқали Әшімов I орын, «Ortalyq Qazaqstan» газетінің дизайнері Айбек Рахымжан ІІ орын, «Бірінші Қарағанды» телеарнасының тілшісі Жанабек Нар III орынды жеңіп алды. Сонымен қатар, «Хабар» агенттігінің арнайы сыйлығын ардагер журналистер Әли Тойжігіт пен Сүйіндік Жанысбай иеленді. Шахматтан ерлер арасында «Новое Телевидение» телеарнасының тілшісі Абылай Аманқұл І орын, «Новое Телевидение» телеарнасының басшысы Руслан Никонович ІІ орын, «Saryarqa» телеарнасының тілшісі Ботабек Тілегенов пен Қазақстан Журналистер одағы облыстық филиалының басшысы Жәнібек Садықанов ІІІ орынды қанжығаға байлады. Қыздар арасында шахматтан «Ortalyq Qazaqstan» газетінің дизайнері Арайлым Көктаева І орын, «Saryarqa» телеарнасының тілшісі Диана Жәмлиханова ІІ орынды олжалды. Журналистер одағының арнайы сыйлығын «Балқаш өңірі» газетінің редакторы Қуаныш Аманқұлов және «Saryarqa» телеарнасының тілшісі Айдана Бекқали алды. Турнир жеңімпаздарының барлығы арнайы дипломмен және бағалы сыйлықтармен марапатталды.

Ардақ Қабыханов еңбек жолын аудандық «Қарқаралы» газетінен бастаған. Облыстық «Saryarqa» телеарнасында да еңбек еткен.
Бұл турнирге Арқаға белгілі меценаттар атсалысты. Бұл қатарда Серік Қасымбеков те бар.

Ерік НАРЫН,
«Ortalyq Qazaqstan»
Сурет ұйымдастырушылардан

Сообщение Жақсының атын жаңғыртып… появились сначала на «ORTALYQ QAZAQSTAN» газеті.

Бақұл бол, қимас бауырым!

editor Ortalyq.kz — Tue, 17 Oct 2023 04:22:58 +0000

Ажалдың арсыз, тойымсыз екеніне тағы көзім жетті. Күнде көрмесем де, сағынып жүретін, кездессек құшағымызды жаятын, сырымызды ақтаратын аяулы досымнан көз жазып қалдым. Анасы ұлынан, жұбайы ерінен, балалары әкесінен, туғандары бауырынан айырылып, қайғының қара бұлты торлаған күнде көз жасын төкті.

Бір кездегі Қарқаралының қара баласы Қазақ Елінің қарапайым жұртының жоғын жоқтайтын, мұң-зарына құлақ түретін, запыранын билікке естіртетін ел сүйетін азаматқа айналған еді. 15 жыл бойы «Хабардың» меншікті тілшісінің қызметін жып-жылы бөлмеде отырмай, алыс-алыс ауылдарға барып, қаймана қазағыңның хал-ахуалын таспаға түсірдің. Сенің эфирден айтқан сөзіңе ел-жұртың да, астанадағы шіренген шен-шекпенділер де сеніп тыңдайтын. Арқасына аяздай батқан мың-миллион мәселелерінің бір шешімін табатынына үміттенетін. Өйткені, журналистік миссияңды адал, таза, ерекше махаббатпен атқардың.

Аяулы досым, сенің кенеттен келген қазаң хас қаһарманның өліміндей неткен ауыр еді. Өзің өсіп-жетілген, томағаңды сыпырған Қарағандыңның да аспаны ерекше түнеріп, мәңгілік сапарға жиылған жұртыңның қабырғасы қайысып, есеңгіреп қалды. Бүгін Қабыхановтар әулеті ғана емес, Қарағандың мен Қарқаралың тұтас аза тұтып, аңырап тұр. Ажалдың бұлай келетінін кім білген? Амалымыз не, аяулы Ардағым! Иманың серігің болғай! Жаның жұмақтың төрінде шалқысын! Қош бол, аяулы дос! Сенің қысқа жіптей тез үзілген қас-қағым ғұмырыңды артыңда қалған жан жарың, балаларың жалғайды. Бақұл бол, қимас бауырым!

Төлен ТІЛЕУБАЙ

Сообщение Бақұл бол, қимас бауырым! появились сначала на «ORTALYQ QAZAQSTAN» газеті.

Аза бойым қаза болды

editor Ortalyq.kz — Tue, 17 Oct 2023 04:09:28 +0000

«Хабар-24» телеарнасының Қарағанды облысындағы меншікті тілшісі Ардақ Қабыханов досымнан айырылып, аза бойым қаза болды бүгін. Өмірден ерте озған әкесінің суретін жиі салып отырушы еді осы әлеуметтік желіге. Сол Асқар тауының жасаған ғұмырына екі жыл жетпей 45 жасында фәниден бақиға аттанып бара жатыр. «Жалғыз сен ғана әкесіз қалып па едің? Біз де жүрміз ғой міне», деп айтпағаныма енді өкініп отырмын. Жазда еңбек демалысымды алып ел жақта жүрсем телефон соғып тұр:
– Әй, Бағдат, қайдасың?
– Ақтоғайдамын.
– Әй, мен Алматыдамын ғой.
– Ее, дұрыс болыпты. Бір жола қайтар кезіңде хабарласпадың ба? – деймін мен де әдеттегідей қалжыңдап. Өзіне қатты жарасатын кеңкілдеген күлкісінен кейін:
– Досым-ау, ештеңе етпейді. Қызым, ҚазМУ-дің журналистикасын бітіріп диплом алған, соған келдім. Ұлым да жоғары оқу орнын аяқтады. Амандық болса, осы дипломдар бар сосын Тоты екеуміздің қосылғанымызға биыл 25 жыл. Барлығын қосып шілденің аяғында той жасаймын, соған келерсің, – деді. Дәм жазып тойына ортақтасып та қайттым. Келгеніме балаша қуанып, ерекше ілтипатын білдіріп еді сол кезде.

Ардақ екеуміз ертеден араластық. Облыстық телеарнада бірге қызмет атқардық. Таңды таңға ұрып шаңырағында талай болдық. Бүгінге дейін жұбымыз жазылған жоқ. Ән салғанымды, жазған өлеңдерімді басқасын қайдам, осы досым алабөтен бағалайтын. Сосын, сағынса болды түн демейді, таң демейді, хабарласа беретін. Бертінге дейін солай болды. Осы жайсаң жігіттің көңілін қалдырмас үшін, таңғы 3-4-те тәтті ұйқымды қиып, ас бөлменің есігін жауып алып немесе балконға шығып қолды сермеп өлең оқимын, жынды адам құсап. Қызды-қыздымен: «Домбыраң қасыңда ма? «Көзкөргенді» айтып берші», – дейді әй-шәй жоқ.

– Әй, қой, отырайын енді жеті қараңғы түнде азынап, – деп тарс ете қалам. Ол күледі ішек-сілесі қатып. Анасынан арда туған абзал досым-ай, сенен қапыда осылай көз жазып қалам деп кім ойлаған? Соңыңда аңырап қалған Анаңа, жарың Тотыға, бала-шағаңа, туған-туыстарыңа Жаратқан ием сабыр берсін! Көрмеген көшеңнен жарылқасын! Алла сені панасына алсын, Ардош. Бақұл бол, досым!

Ардағым-ай,

Жете алмай-ақ кеттің-ау, арманыңа-ай.
Жан-тәнімен тілеулес болып жүрген,
Енді маған бұндай дос, бар ма, Құдай?
Ардошым-ау, деуші едім, Ардошым-ай,
Сенсіз мына дүние қалды осылай.
Жаны таза,
Жүрегі ақ,
Жүзі жылы,
Жөнің бөлек еді ғой, жан досым-ай!

Жүретін шағымызда дүркіреп құр,
Аспаным қоя берді-ау күркіреп бір.
Ақсораңның басынан ауған бұлт,
Соқырдың бойына кеп сіркіреп тұр.

Артыңдағы ұрпағың көктесе екен,
Бұдан кейін Тоты жас төкпесе екен.
Қарқаралы барлығын көтереді,
Қайран шешең, езіліп кетпесе екен.

Білесің жалғызсырап, жабығамын,
Мендегі сырдың саған бәрі мәлім.
Кеңкілдеп күлгеніңді, қайран досым,
Еңкілдеп, енді жылап сағынамын…

Бағдат МҮБӘРАК

Сообщение Аза бойым қаза болды появились сначала на «ORTALYQ QAZAQSTAN» газеті.