Судьялар спорт алаңында
Кеше облыс әкімі Нұрмұхамбет ӘБДІБЕКОВ Қазақстан Республикасы Судьялары одағының VIII спартакиадасына қатысушыларды финалдық ойындардың салтанатты ашылу рәсімімен құттықтады.
– Спартакиаданың ел Тәуелсіздігінің 25 жылдығы және Қарағанды облысының 80 жылдық мерейтойы қарсаңында өткізіліп отырғаны қуантады. Тәуелсіз мемлекетіміз денсаулығы мықты буын тәрбиелеуге басымдық береді. Спорттық іс-шараларға қатысу өзіңізді ортақ мүддеге жұмылған команданың мүшесі ретінде сезінуге мүмкіндік береді. Мұндай тәжірибе күнделікті кездесетін күрделі мәселелерді шешуге жол ашады, – деді аймақ басшысы.
Мұндай спорттық іс-шараларды жыл сайын өткізу дәстүрге айналды.
Міне, осымен сегізінші жыл қатарынан отандық сот жүйесінің жүзден астам өкілдері спорттық іс-шараларға белсенді қатысып келеді. Бұл спартакиадада жартылай финалдық бәсекелерде жеңіске жеткен судьялар еліміздің түпкір-түпкірінен бас қосты.
Спартакиада спорттың 7 түрі (шағын футбол, волейбол, үлкен және үстел теннисі, бильярд, шахмат, шашки) бойынша өткізілуде.
Жарыстың ашылу салтанатына облыстың сот жүйесінің ардагерлері, Республиканың танымал спортшылары – әлем чемпионаттарының, халықаралық жарыстардың жеңімпаздары мен жүлдегерлері қатысты.
Облыс әкімінің баспасөз қызметі.