Әдебиет

Шерді шерткен мұңлы жыр

ШЕР-ХАН

Көзін сұмдық шел басқандар бар,
Көкірегін шындық шер басқандар бар,
Ұлт үстінен ұпайын түгендеп,
Ұялмай-қызармай жер басқандар бар!
Бір кем дүние!..

Құлқын деп жеңін түретіндер бар,
Ұлтым деп өмір сүретіндер бар,
Үріп кеп ішіп, шайқап кеп төгіп,
Үйіне қарсы үретіндер бар!
Бір кем дүние!..

Ердің арқаға бататыны бар,
Сарттың сырттан сататыны бар,
Батыр сонда да моласымен-ақ,
Жаудан Жер қорғап жататыны бар!
Бір кем дүние!..

Мирас Асан

***
Алып бәйтерек құлады,
Қырандай еді-ау қырағы.
Құшақ жайып тұр қара жер,
Көк аспан іштен тынады.

Арындап өткен боздақ-дүр,
Қолқамды кетті қозғап бір.
Боз жусан басқан боз далаң,
Ботадай бүгін боздап тұр.

Жоқтап тұр далаң затыңды өр,
Артыңда Шерлі жатыр жол.
Алдаспан рухың мәңгілік
Бақұл бол аға,
Бақұл бол!

Жәлел Қуандықұлы

09.10.2018 ж

Басқа материалдар

Пікір үстеу

Э-пошта мекенжайыңыз жарияланбайды. Міндетті өрістер * таңбаланған

This site uses Akismet to reduce spam. Learn how your comment data is processed.

Back to top button