📰 Газет туралы

Қарағанды облыстық «Орталық Қазақстан» қоғамдық-саяси газеті.1931жылғы 4 қазаннан бастап шығып келеді. 2006 жылы облыс жұртшылығы газеттің тұңғыш номері шығуының 75 жылдығын салтанатты түрде атап өтті. Кеңестік кезеңде облыстық, қалалық парткомның, қалалық, облыстық аткомның органы болды, тәуелсіздік жылдары құрылтайшысы – облыс әкімінің аппараты. Қарағанды таскөмір бассейнінің қауырт игеріле бастауына байланысты бастапқыда «Қарағанды пролетариаты» деп аталған. Қарағанды облыс орталығына айналғаннан кейін 1938 ж. «Советтік Қарағанды» деген ат алды. 1963 ж. 1 мамырдан – «Орталық Қазақстан».

Газеттің негізін қалауға қазақтың көрнекті жазушылары Ғ.Мұстафин, Ә.Әбішев, С.Ерубаев елеулі үлес қосты. 1933-35-жылдары С.Мұқанов, Б.Майлин (бірнеше рет) Қарағандыға арнайы келіп, шахтерлер өмірінен шығармалар жазды, редакция қызметкерлеріне баға жетпес көмек көрсетті. Газет 1943 ж. ақындар айтысының қайрадан жандануына ұйтқы болды. Қазақ журналистикасының белгілі қайраткерлері Ж. Орманбаев, Т.Нұртазин, Ә.Қарағұлов, К.Үсебаев, Б.Тәйкіманов, Ә.Бөлдекбаев, Р.Сағымбеков, А.Ахметәлімов, Н.Оразбеков әр жылы осында басшы қызметте болды, жас қаламгерлерді тәрбиеледі. Өзінің 75 жылдық даңқты тарихында газет республиканың индустриалды жүрегі – Қарағанды өңірінің әлеуметтік-экономикалық мәселелерін жазып көрсетуде көрнекті табыстарға жетті.

1981 жылы басылымның 50 жылдығы құрметіне Еңбек Қызыл Ту орденімен марапатталды.

2001 жылы басылым газеттерді безендіруге арналған «Жаңа ғасыр жарнамасы – 2001» республикалық конкурсында жүлделі орынға ие болды.

2002 жылы газет «Тәуелсіздік жылнамасы» мақалалар тізбегі (1991-2001 ж.ж.) үшін Қазақстан Журналистер одағының республикалық шығармашылық бәйгесінің лауреаты атағын алды.

2007 жылы Қазақстан Журналистика Академиясының «Алтын жұлдыз» сыйлығымен марапаттады.

Редакцияда ҚР Журналистер одағы сыйлығының 5 лауреаты (М.Сембаев, А.Жанғожин, Е.Лұқпанов, Е. Балташұлы, Е.Мұсабеков) бар, редакцияның 10 қызметкері Облыс әкімінің Құрмет грамотасына, б қызметкері ҚР Мәденит министрлігінің «Мәдениет қайраткері» белгісіне ие.

Бас редактордың 1-орынбасары А.Жанғожин 2007 ж. «Еңбектегі ерлігі үшін» медалімен марапатталды.

Облыс әкімі Н.Нығматулин тағайындаған облыс журналистерінің «Алтын сұңқар» сыйлығының лауреаттары: 2006 ж. – А.Ақын, Қ.Әбілдинов, Ж.Иманалиев, 2007 ж. – Е.Лұқпанов, 2008 ж. – А.Жанғожин, С.Сексенов, 2009 ж.- Е.Имаш.
Тәжірибелі қаламгерлер С.Алпысов, С.Жанысбай, Е.Лұқпанов, М.Омарбеков Қазақстан Журналистер одағының «Қазақстанның Құрметті Журналисі» құрметті атағына , ал бас редактордың орынбасары Е.Балташұлы Қазақстан Журналистері Конгресі сыйлығына ие болды.

Газет 2007 жылғы 8 наурыздан А-2 форматымен басылады.Таралымы 20 мың дана (2007 жылдан). Аптасына 3 рет (сейсенбі-4 бет, бейсенбі-6 бет, сенбі-8 бет) шығады.

1997 жылдан 2019 жылға дейін «Орталық Қазақстан» газетінің Бас редакторы лауазымын Мағауия Сланбекұлы Сембаев атқарды. Мағауия Сланбекұлы 1955 Қарқаралы ауданындағы Аққора ауылында дүниеге келген. 1976 жылы Қазақ мемлекеттік университетінің журналистика факультетін бітірген соң қаламгерлік қызметін Қарағанды облыстық «Орталық Қазақстан» газетінде бастайды. Мұнда қатардағы тілшіден бөлім меңгерушісі, жауапты хатшы, бас редактордың бірінші орынбасарына дейінгі жолдан өтті. Республикалық «Егемен Қазақстан» газетінің аға тілшісі, Қарағанды облысы бойынша меншікті тілшісі болған. 1997 жылдан — «Орталық Қазақстан» газетінің бас редакторы. «Жауынгер қыздар» — «Боевые подруги» (1995), «Қолыма қалам алдым айтамын деп…» (2005), «Алаштың алдаспаны» (2010), «Ойтамызық» (2015), «Құбылыс» (2016)және «Жерұйық» (2017) жинақтарының авторы. Қазақстан Журналистер одағы сыйлығының лауреаты (1980), Г.Толмачев атындағы республикалық байқаудың «2009 жылғы таңдаулы БАҚ редакторы» сыйлығының иегері, Қазақстанның еңбек сіңірген қайраткері (2009). Облыстық Мәслихаттың 111 және 1У шақырылымының депутаты (2003 жылдан). Қазақстан Республикасы Мәдениет және ақпарат министрлігінің «Мәдениет қайраткері» белгісінің иегері. ҚР төрт мерекелік медалімен марапатталған. Бұдан бөлек Қарағанды облысы әкімінің «Алтын сұңқар» сыйлығының арнай жүлдесінің, ҚР Президенті сыйлығының иегері.

2019 жылдың 24 қаңтарында Арқаның аға басылымына 1997 жылдан бері басшылық еткен Президент сыйлығының иегері, қаламы қарымды журналист Мағауия Сланбекұлы СЕМБАЕВ зейнет жасына жетуіне байланысты Директор – Бас редактор қызметінен босатылды. «Орталық Қазақстан» басылымының Директор – Бас редакторы лауазымына осы газеттің мектебінен өтіп, ел газеті «Егемен Қазақстанда», ҚР Ақпарат және коммуникациялар министрлігінде жауапты қызметтерді атқарған Қамбар Жұмағалиұлы АХМЕТОВ тағайындалды.

Қамбар Жұмағалиұлы АХМЕТОВ

1978 жылы Қарағанды облысының Ақтоғай ауданында дүниеге келген.

Е.А.Бөкетов атындағы ҚарМУ-дың түлегі

Журналистикадағы еңбек жолын «Балқаш өңірі» қалалық газетінің тілшісі қызметінде бастаған.

2004-2006 жж. Қарағанды облыстық «Орталық Қазақстан» газетінде тілші;

2006-2007 жж. Қарағанды облыстық «Балқантау» газетінде тілші;

2005-2008 жж. «Қазақстан баспасөз клубы» АҚ Қарағанды облысы бойынша өкілі;

2007-2014 жж. Республикалық қоғамдық-саяси «Айқын» газетінің тілшісі;

2010-2013 жж. Baq.kz ақпараттық агенттігінің Бас редакторы;

2013-2014 жж. «Қазақстан» РТРК» АҚ Интернет жобалар бөлімінде Бас редактор;

2014-2016 жж. «Нұр Отан» партиясы «Электрондық партия» медиа редакциясы интернет-ресурсының басшысы;

2016-2018 жж. ҚР Ақпарат және коммуникациялар министрінің кеңесшісі;

2018 жылдан «Егемен Қазақстан» республикалық газеті Бас редакторының орынбасары қызметтерін атқарған;

Үйленген, үш ұлы, бір қызы бар.

ҚР Президентінің Алғыс хатымен;

ҚР Ақпарат және коммуникациялар министрлігінің «Ақпарат саласының үздігі» төсбелгісімен марапатталған.