Ермеков жүлдесі – алғыр оқушыда
Әлімхан ЕРМЕКОВ атындағы республикалық олимпиада зияткер оқушылардың басын қосты. Жүзден жүйрік шыққан жеңімпазға облыс әкімі 250 мың теңге табыстады.
Қазақстанның түпкір-түпкірінен кіл мықтылар жиналған олимпиада – Ел Тәуелсіздігінің 25 жылдығы және Әлімхан Ермековтің 125 жылдығына арналды. Жеңімпаз жүлдесіне Қарағанды облысы әкімінің сыйлығы ұсынылды.
– Екі күнге жалғасқан олимпиада – Қарағанды мемлекеттік техникалық университеті қабырғасында тегін өткізілген жоқ. Себебі, политехте Әлімхан Ермеков ұстаздық етті, Елбасы білім алды.
Алдағы уақытта, Ермеков олимпиадасы – еліміздегі Орымбек Жәутіков олимпиадасы, Қаныш Сәтбаев олимпиадасымен қатар жыл сайын жарасымды жалғасын табатын болады, – деді облыс әкімі Н.Әбдібеков.
Барлық облыстан 115 оқушы бақ сынаған. Олимпиада 2 кезеңнен тұрып, жас математиктер күрделі есептерді шешті. Сонымен қатар, сайыс аясында қатысушылар үшін мәдени-сауық бағдарламалары мен релакс тренингтер де ұйымдастырылды.
Олимпиаданың салтанатты жабылуында ұйымдастырушылар арнайы бағдарламамен қатар, жеңімпаздар мен жүлдегерлерді медаль және бағалы сыйлықтармен марапаттады. Қатысушылар 5 аталым бойынша Қазақстан Республикасының ғалым-математиктері атындағы бағалы сыйлықтарға ие болды.12 орын – жүлдегерлерге тапсырылды.
Астана қалалық қазақ-түрік лицейінің 12 жастағы оқушысы Данат Дүйсембеков республикалық олимпиаданың Гран-при иегері атанып, Қарағанды облысы әкімінің сыйлығына ие болды.
Аяулым СОВЕТ
