Қарағандыда “Armanǵa jol-2019” жартылай марафоны өтеді
Қарағанды қаласында 19 мамыр күні “Armanǵa jol” жартылай марафоны өтеді. Қазір қатысушыларды тіркеу басталды. Сондай-ақ, марафон ережелері мен маршруттары белгіленген. Бұл туралы облыс әкімінің баспасөз қызметі хабарлады.
Қатысушылар түрлі қашықтыққа жүгіреді. Олардың ішіндегі ең бастысы – “Armanǵa jol” жартылай марафоны (21 шақырым). «Спутник» деп аталатын екінші дистанцияның ұзындығы –14 шақырым. Бұл жүгірулерге тек кәмелетке толған тұрғындарға ғана рұқсат беріледі.
Кез-келген жас мөлшеріндегі және мүмкіндігі шектеулі қатысушылар ұзындығы 7 шақырымды құрайтын «Достык» дистанциясын жүгіріп өте алады. Ал 8-ден 13 жас аралығындағы балалар екі шақырымдық «Балапан» қашықтығына жүгіреді.
Биыл жылдағы дәстүрге өзгерістер енгізіліп, скандинав жүрісі бойынша тағы екі номинация қосылды. Оған қатысушылар 7 шақырым қашықтықты жүріп өтеді.
“Armanǵa jol” жартылай марафоны ақылы болмақ. Қатысу жарнасы – 2 000 теңге. Ал, өзге қашықтықтар тегін. Қазіргі таңда марафонның барлық маршруттары белгіленіп қойды.