Қар тазалау – қарқынды
Қарағандыға қыстың қаһары келді. Екі күн болды қар толастар емес. Таға да ақ ұлпа жауып жатыр. Синоптиктердің айтуына қарағанда, қар келесі түнге дейін жалғасады. Өткен түннен бері жауған қардың қалыңдығы 5 см-ден асты. Бұл туралы «Благоустройства» КМК баспасөз қызметі хабарлады.
Қаланың коммуналдық қызметтері қар жауғалы дереу іске кірісіп, таң атқанша бірнеше рет қаланың жолдары мен көшелеріне құм шашқан, бұл жұмыстарға арнайы техника жұмылдырылған.
– Қазіргі уақытта қалада қар тазалау жұмыстарымен жалпы саны 129 техника айналысуда. Магистральді көшелер мен жол айырықтарындағы қарларды сыртқа шығару мен тазалау жұмыстары орындалуда. Екі күннің есебі бойынша қала сыртына шығарылған қар көлемі 7114.9 текше метрге жетті,– дейді кәсіпорынның баспасөз қызметі.
Сонымен қатар, қалалық коммуналдық шаруашылық кәсіпорындары қаладағы құлаған талдар мен сынған бұталарды кесіп, қала сыртына шығаруда. Осы апта аяз болады деп күтілуде. Сондықтан, айтулы саланың қызметкерлері күндіз-түні 2 ауысымда еңбек етіп, қарды тазалау ісін бақылайтын арнайы кезекшілік ұйымдастырмақшы.
Нұрдос КӘРІМ
